എണ്ണ നയതന്ത്രത്തിൽ അമേരിക്ക ഇരട്ടത്താപ്പ് കാണിക്കുന്നതായി ഇറാന്റെ വിദേശകാര്യ മന്ത്രി സയ്യിദ് അബ്ബാസ് അരാഗ്ചി ആരോപിച്ചു. റഷ്യൻ ക്രൂഡ് ഓയിൽ വാങ്ങുന്നതിനെതിരെ നേരത്തെ നിലപാടെടുത്ത വാഷിംഗ്ടൺ, ഇപ്പോൾ ഇറാന്റെ എണ്ണ വിപണി തടസ്സപ്പെട്ടതോടെ റഷ്യൻ എണ്ണ വാങ്ങാൻ രാജ്യങ്ങളോട് ആവശ്യപ്പെടുകയാണെന്ന് അദ്ദേഹം പരിഹസിച്ചു. ഇറാനുമായുള്ള യുദ്ധം ആഗോള ഊർജ്ജ വിപണിയെ ബാധിച്ച പശ്ചാത്തലത്തിലാണ് അമേരിക്കയുടെ ഈ മാറ്റമെന്നും അരാഗ്ചി ചൂണ്ടിക്കാട്ടി.

"റഷ്യയിൽ നിന്നുള്ള എണ്ണ ഇറക്കുമതി അവസാനിപ്പിക്കാൻ മാസങ്ങളോളം ഇന്ത്യയെ ഭീഷണിപ്പെടുത്തിയ അമേരിക്ക, ഇറാനുമായുള്ള യുദ്ധം രണ്ടാഴ്ച പിന്നിടുമ്പോൾ ഇന്ത്യയുൾപ്പെടെയുള്ള ലോകരാഷ്ട്രങ്ങളോട് റഷ്യൻ എണ്ണ വാങ്ങാൻ കെഞ്ചുകയാണ്," അരാഗ്ചി എക്സിൽ കുറിച്ചു.റഷ്യക്കെതിരെ അമേരിക്കയുടെ പിന്തുണ ലഭിക്കുമെന്ന പ്രതീക്ഷയിൽ ഇറാനെതിരായ "നിയമവിരുദ്ധ യുദ്ധത്തെ" പിന്തുണയ്ക്കുന്ന യൂറോപ്യൻ സർക്കാരുകളെയും അദ്ദേഹം വിമർശിച്ചു. ഇത് ദയനീയമായ നീക്കമാണെന്ന് അദ്ദേഹം വിശേഷിപ്പിച്ചു. എണ്ണവില വർദ്ധിക്കുന്നത് റഷ്യയുടെ വരുമാനം വർദ്ധിപ്പിക്കുന്നു എന്ന ഫിനാൻഷ്യൽ ടൈംസ് വാർത്തയുടെ പശ്ചാത്തലത്തിലായിരുന്നു അദ്ദേഹത്തിന്റെ പ്രതികരണം.മിഡിൽ ഈസ്റ്റിലെ യുദ്ധത്തെത്തുടർന്ന് ആഗോള വിപണിയിൽ എണ്ണവില ബാരലിന് 100 ഡോളർ കടന്നതോടെയാണ് ട്രംപ് ഭരണകൂടം റഷ്യൻ എണ്ണയുടെ കാര്യത്തിൽ ഇളവുകൾ പ്രഖ്യാപിച്ചത്. കടലിൽ കുടുങ്ങിക്കിടക്കുന്ന റഷ്യൻ എണ്ണക്കപ്പലുകൾ വാങ്ങാൻ വിവിധ രാജ്യങ്ങൾക്ക് 30 ദിവസത്തെ അനുമതി (Waiver) നൽകിക്കൊണ്ടുള്ള ഉത്തരവ് വ്യാഴാഴ്ച പുറത്തിറങ്ങിയിരുന്നു.ഇറാന്റെ ഹോർമുസ് കടലിടുക്ക് അടച്ചുപൂട്ടിയതും യുദ്ധം മൂലം എണ്ണ വിതരണം തടസ്സപ്പെട്ടതും ആഗോള വിപണിയെ കടുത്ത പ്രതിസന്ധിയിലാക്കിയിരിക്കുകയാണ്. മാർച്ച് 12-ന് മുമ്പ് കപ്പലുകളിൽ കയറ്റിയ റഷ്യൻ എണ്ണയ്ക്കും പെട്രോളിയം ഉൽപ്പന്നങ്ങൾക്കും ഏപ്രിൽ 11 വരെയാണ് അമേരിക്കൻ ട്രഷറി ഡിപ്പാർട്ട്മെന്റ് അനുമതി നൽകിയിരിക്കുന്നത്. വിപണിയെ സ്ഥിരപ്പെടുത്താനാണ് ഈ താത്കാലിക നടപടിയെന്നും റഷ്യയ്ക്ക് ഇതിലൂടെ വലിയ സാമ്പത്തിക നേട്ടമുണ്ടാകില്ലെന്നും യുഎസ് ട്രഷറി സെക്രട്ടറി സ്കോട്ട് ബെസന്റ് വ്യക്തമാക്കി.

യുദ്ധം രൂക്ഷമാണെങ്കിലും ഇന്ത്യൻ പതാകയുള്ള രണ്ട് എൽപിജി (Liquefied Petroleum Gas) കപ്പലുകളെ ഹോർമുസ് കടലിടുക്കിലൂടെ കടന്നുപോകാൻ ഇറാൻ അനുവദിച്ചതായി വാർത്താ ഏജൻസിയായ റോയിട്ടേഴ്സ് റിപ്പോർട്ട് ചെയ്തു. തന്ത്രപ്രധാനമായ ഈ ജലപാതയിലൂടെ ഇന്ത്യയിലേക്കുള്ള കപ്പലുകളുടെ സുരക്ഷിതമായ യാത്ര ഉറപ്പാക്കുമെന്ന് ഇന്ത്യയിലെ ഇറാൻ അംബാസഡർ മുഹമ്മദ് ഫത്താലി പറഞ്ഞു.

"ഇന്ത്യയും ഇറാനും സുഹൃത്തുക്കളായതിനാൽ ഇന്ത്യൻ കപ്പലുകൾക്ക് തടസ്സമുണ്ടാകില്ല," എന്നായിരുന്നു ഫത്താലിയുടെ പ്രതികരണം. ഇരുരാജ്യങ്ങൾക്കും പൊതുവായ താല്പര്യങ്ങളും സമാനമായ വിധിയുമാണുള്ളതെന്നും അദ്ദേഹം കൂട്ടിച്ചേർത്തു. ഇന്ത്യയിലേക്കുള്ള കപ്പലുകൾക്ക് രണ്ട് മുതൽ മൂന്ന് മണിക്കൂറിനുള്ളിൽ സുരക്ഷിത പാത ഒരുക്കാൻ സാധിക്കുമെന്നും അദ്ദേഹം സൂചിപ്പിച്ചു.

മേഖലയിൽ വൻ സംഘർഷം നിലനിൽക്കുമ്പോഴും ന്യൂഡൽഹിയും ടെഹ്‌റാനും തമ്മിലുള്ള ദീർഘകാലത്തെ സാമ്പത്തിക-നയതന്ത്ര ബന്ധം ശക്തമായി തുടരുന്നുവെന്നാണ് ഈ നീക്കം വ്യക്തമാക്കുന്നത്. ആഗോളതലത്തിൽ അമേരിക്കയും ഇറാനും തമ്മിലുള്ള പോരാട്ടം കടുക്കുമ്പോഴും ഇന്ത്യയെ സംബന്ധിച്ചിടത്തോളം ഊർജ്ജ സുരക്ഷയിൽ ഇറാന്റെ ഈ നിലപാട് വലിയ ആശ്വാസമാണ്