അമേരിക്കയും ഇസ്രായേലുമായി നിലനിന്നിരുന്ന കടുത്ത സൈനിക യുദ്ധത്തിന് താൽക്കാലിക വെടിനിർത്തൽ പ്രഖ്യാപിച്ച് ആഴ്ചകൾ മാത്രം പിന്നിടുമ്പോൾ, തങ്ങളുടെ ഡ്രോൺ ഉത്പാദന ശൃംഖലകൾ പുനഃസ്ഥാപിച്ചുകൊണ്ട് ഇറാൻ. യുഎസ് രഹസ്യാന്വേഷണ ഏജൻസികളുടെ വിലയിരുത്തലുകളെ ഉദ്ധരിച്ച് സിഎൻഎൻ (CNN) പുറത്തുവിട്ട പുതിയ റിപ്പോർട്ട് പ്രകാരം, തങ്ങളുടെ തകർന്ന സൈനിക വ്യവസായ അടിത്തറകൾ അമേരിക്കൻ അധികൃതർ പ്രതീക്ഷിച്ചതിലും വളരെ വേഗത്തിലാണ് ഇറാൻ പുനർനിർമ്മിക്കുന്നത്.

"ഇറാന്റെ സൈനിക വീണ്ടെടുക്കൽ പ്രക്രിയയെക്കുറിച്ച് അമേരിക്കൻ ഇന്റലിജൻസ് കമ്മ്യൂണിറ്റി (IC) കണക്കാക്കിയിരുന്ന എല്ലാ സമയപരിധികളെയും അവർ അട്ടിമറിച്ചിരിക്കുകയാണ്," ഒരു യുഎസ് ഉദ്യോഗസ്ഥൻ സിഎൻഎന്നിനോട് പറഞ്ഞു. നിലവിലുള്ള നയതന്ത്ര ചർച്ചകൾ പരാജയപ്പെട്ടാൽ ഇറാനെതിരെയുള്ള സൈനിക നടപടികൾ വീണ്ടും ആരംഭിക്കുമെന്ന് യുഎസ് പ്രഡിഡന്റ് ഡൊണാൾഡ് ട്രംപ് മുന്നറിയിപ്പ് നൽകിക്കൊണ്ടിരിക്കുന്ന പശ്ചാത്തലത്തിലാണ് ഈ പുതിയ സുരക്ഷാ റിപ്പോർട്ട് പുറത്തുവന്നിട്ടുള്ളത്.

ഇറാന്റെ ഈ അതിവേഗത്തിലുള്ള സൈനിക വീണ്ടെടുപ്പ് അമേരിക്കൻ രഹസ്യാന്വേഷണ ഉദ്യോഗസ്ഥരെപ്പോലും പൂർണ്ണമായി അമ്പരപ്പിച്ചിരിക്കുകയാണ്. യുദ്ധത്തിന് ശേഷമുള്ള ആദ്യകാല വിലയിരുത്തലുകളിൽ, അമേരിക്കൻ-ഇസ്രായേൽ സംയുക്ത ബോംബാക്രമണത്തിൽ തകർന്ന സൈനിക ശേഷി വീണ്ടെടുക്കാൻ ടെഹ്റാന് വർഷങ്ങൾ വേണ്ടിവരുമെന്നാണ് വാഷിംഗ്ടൺ കരുതിയിരുന്നത്. എന്നാൽ അടുത്ത ആറ് മാസത്തിനുള്ളിൽ ഇറാന് അവരുടെ ഡ്രോൺ ആക്രമണ ശേഷി പൂർണ്ണമായും പുനഃസ്ഥാപിക്കാൻ കഴിയുമെന്നാണ് പുതിയ റിപ്പോർട്ടുകൾ വ്യക്തമാക്കുന്നത്.

അനുബന്ധ വാർത്തകൾ

കപ്പലുകൾക്ക് യാത്രാ നികുതി ഏർപ്പെടുത്താനുള്ള ഇറാന്റെ നീക്കത്തെ അമേരിക്ക എതിർത്തു (Photo- ITG)

യുഎസ്-ഇറാൻ ചർച്ചകളിൽ ഭിന്നത കുറയുന്നു; തർക്കം ഇവയിൽ മാത്രം 

ഹോർമുസിലും ഇറാൻ കൂടുതൽ നിയന്ത്രണം ഏർപ്പെടുത്താൻ പദ്ധതിയിടുകയാണ് 

യുറേനിയം കൈമാറണമെന്ന ട്രംപിൻ്റെ ആവശ്യം നിരസിച്ച് ഇറാൻ  

Hormuz Strait

ഹോർമുസിൽ ഇറാൻ പുതിയ നിയന്ത്രണ സംവിധാനം  

ഡൊണാൾഡ് ട്രംപ്, നെതന്യാഹു

ട്രംപുമായി ഭിന്നത? നിയന്ത്രണം വിട്ട് നെതന്യാഹു!  

ഡൊണാൾഡ് ട്രംപ്

'ഇറാനിൽ നിന്ന് മറുപടി ലഭിക്കാൻ കുറച്ചു കൂടി കാത്തിരിക്കാം' 

സിഎൻഎൻ റിപ്പോർട്ട് അനുസരിച്ച്, ഇറാന്റെ ആയിരക്കണക്കിന് ഡ്രോണുകൾ ഇപ്പോഴും യാതൊരു കേടുപാടുകളും കൂടാതെ സുരക്ഷിതമായി ഇരിപ്പുണ്ട്. ഇറാന്റെ മൊത്തം ഡ്രോൺ ശേഷിയുടെ പകുതിയോളം യുദ്ധത്തെ അതിജീവിച്ചതായാണ് യുഎസ് രഹസ്യാന്വേഷണ വിഭാഗം ഇപ്പോൾ വിലയിരുത്തുന്നത്. ഇതിനൊപ്പം ഇറാന്റെ തീരദേശ പ്രതിരോധ ക്രൂയിസ് മിസൈലുകളും (Coastal defence cruise missiles) ഇപ്പോൾ പൂർണ്ണ സജ്ജമാണ്. ഹോർമുസ് കടലിടുക്കിലെ (Strait of Hormuz) ആഗോള കപ്പൽ ഗതാഗത പാതകളെ ലക്ഷ്യമിടാൻ ടെഹ്റാന് ഈ ആയുധങ്ങൾ ഉപയോഗിക്കാം എന്നതിനാൽ ഈ മിസൈലുകൾക്ക് വലിയ തന്ത്രപ്രധാന പ്രാധാന്യമുണ്ട്.

യുഎസ്-ഇസ്രായേൽ ആക്രമണങ്ങളുടെ ഫലപ്രാപ്തി ചോദ്യം ചെയ്യപ്പെടുന്നു

പുതിയ രഹസ്യാന്വേഷണ കണ്ടെത്തലുകൾ മുൻപ് നടന്ന യുഎസ്-ഇസ്രായേൽ സൈനികാക്രമണങ്ങൾ എത്രത്തോളം വിജയകരമായിരുന്നു എന്നതിനെക്കുറിച്ചും പുതിയ ചോദ്യങ്ങൾ ഉയർത്തുന്നുണ്ട്. ഈ ആഴ്ച യുഎസ് കോൺഗ്രസിൽ സംസാരിക്കവെ, യുഎസ് സെൻട്രൽ കമാൻഡ് (CENTCOM) കമാൻഡർ അഡ്മിറൽ ബ്രാഡ് കൂപ്പർ അവകാശപ്പെട്ടിരുന്നത് ഈ വ്യോമാക്രമണങ്ങൾ ഇറാന്റെ പ്രതിരോധ വ്യവസായത്തെ പൂർണ്ണമായി തകർത്തുവെന്നായിരുന്നു. യുഎസ് പ്രസിഡന്റും പലതവണ ഇതേ കാര്യം ആവർത്തിച്ചിരുന്നു.

"ഓപ്പറേഷൻ എപിക് ഫ്യൂരി (Operation Epic Fury) ഇറാന്റെ ബാലിസ്റ്റിക് മിസൈലുകളെയും ഡ്രോണുകളെയും വലിയ തോതിൽ നശിപ്പിച്ചു. അവരുടെ പ്രതിരോധ വ്യവസായ അടിത്തറയുടെ 90 ശതമാനവും തകർത്തതിനാൽ വർഷങ്ങളോളം ഇറാന് ഇനി തിരിച്ചുവരാൻ കഴിയില്ല," കൂപ്പർ പറഞ്ഞു. എന്നാൽ പുതിയ ഇന്റലിജൻസ് റിപ്പോർട്ടുകൾ ഈ അവകാശവാദത്തെ പൂർണ്ണമായി തള്ളിക്കളയുന്നതാണ്.

Advertisement

ഇറാന്റെ പുനർനിർമ്മാണ പ്രക്രിയ വർഷങ്ങളോളം പിന്നോട്ട് പോയിട്ടില്ലെന്നും കേവലം ഏതാനും മാസങ്ങൾ മാത്രമാണ് അതിന് തടസ്സം നേരിട്ടതെന്നും പുതിയ വിലയിരുത്തലുകൾ വ്യക്തമാക്കുന്നു. ചില സുപ്രധാന സൈനിക ഉത്പാദന കേന്ദ്രങ്ങൾ വ്യോമാക്രമണങ്ങളിൽ നിന്നും ഒഴിഞ്ഞുമാറിയവയോ അല്ലെങ്കിൽ പൂർണ്ണമായി തകരാത്തവയോ ആണ്.

ഇതാണ് അതിവേഗം പ്രവർത്തനം പുനരാരംഭിക്കാൻ ഇറാനെ സഹായിച്ചത്. ഇറാന്റെ പകുതിയോളം മിസൈൽ ലോഞ്ചറുകൾ ബോംബാക്രമണത്തെ അതിജീവിച്ചുവെന്നായിരുന്നു യുഎസ് ആദ്യം കരുതിയിരുന്നത്. എന്നാൽ പുതിയ കണക്കുകൾ പ്രകാരം ഇത് മൂന്നിൽ രണ്ട് ഭാഗത്തോളം (ഏകദേശം 66 ശതമാനത്തിലധികം) സുരക്ഷിതമാണെന്ന് വ്യക്തമാകുന്നു.

സഖ്യകക്ഷികളുടെ പിന്തുണ ലഭിച്ചോ?

അതിവേഗത്തിലുള്ള ഇറാന്റെ ഈ തിരിച്ചുവരവിന് പിന്നിൽ വിദേശ രാജ്യങ്ങളുടെ പിന്തുണയുണ്ടാകാമെന്നും യുഎസ് രഹസ്യാന്വേഷണ വിഭാഗം സംശയിക്കുന്നുണ്ട്. റഷ്യ, ചൈന എന്നീ രാജ്യങ്ങളിൽ നിന്നും ലഭിച്ച പിന്തുണയും ആക്രമണങ്ങളിൽ പ്രധാന കേന്ദ്രങ്ങൾക്ക് വലിയ തോതിൽ നാശനഷ്ടങ്ങൾ സംഭവിക്കാതിരുന്നതുമാണ് തങ്ങളുടെ സൈനിക ഉത്പാദന ശൃംഖല വേഗത്തിൽ പുനഃസ്ഥാപിക്കാൻ ഇറാനെ സഹായിച്ചതെന്ന് ഔദ്യോഗിക വൃത്തങ്ങൾ സിഎൻഎന്നിനോട് പറഞ്ഞു.

യുദ്ധസമയത്ത് മിസൈൽ നിർമ്മാണത്തിന് ആവശ്യമായ പ്രധാന ഘടകങ്ങൾ ചൈന ഇറാനിലേക്ക് തുടർച്ചയായി എത്തിച്ചിരുന്നു. എന്നാൽ ഇറാന്റെ തുറമുഖങ്ങൾക്ക് ചുറ്റും അമേരിക്ക ഏർപ്പെടുത്തിയ ശക്തമായ നാവിക ഉപരോധം (Naval blockade) കാരണം ഈ വിതരണം ഇപ്പോൾ കുറഞ്ഞിട്ടുണ്ടെന്നാണ് യുഎസ് കരുതുന്നത്.

മിസൈൽ നിർമ്മാണത്തിനുള്ള സാങ്കേതിക ഘടകങ്ങൾ നൽകി ചൈന ഇറാനെ സഹായിക്കുന്നുണ്ടെന്ന് ഇസ്രായേൽ പ്രധാനമന്ത്രി ബെന്യാമിൻ നെതന്യാഹുവും അടുത്തിടെ ആരോപിച്ചിരുന്നു. എന്നാൽ ചൈന ഈ ആരോപണം ശക്തമായി നിഷേധിച്ചു. ഇസ്രായേലിന്റെ ആരോപണങ്ങൾ വസ്തുതാവിരുദ്ധമാണെന്ന് ചൈനീസ് വിദേശകാര്യ മന്ത്രാലയ വക്താവ് ഗുവോ ജിയാകുൻ പ്രതികരിച്ചു. ഈ പുതിയ സുരക്ഷാ ആശങ്കകൾ നിലനിൽക്കുമ്പോഴും, പശ്ചിമേഷ്യയിലെ അമേരിക്കയുടെ സൈനിക മേധാവിത്വത്തിൽ പൂർണ്ണ ആത്മവിശ്വാസമുണ്ടെന്നാണ് പെന്റഗൺ വ്യക്തമാക്കുന്നത്.