വാഷിംഗ്‌ടൺ: കാലിഫോർണിയ സംസ്ഥാനത്തെ വോട്ടർ പട്ടികയുമായി ബന്ധപ്പെട്ട ക്രിമിനൽ അന്വേഷണത്തിന്റെ ഭാഗമായി പ്രാദേശിക തിരഞ്ഞെടുപ്പ് ഉദ്യോഗസ്ഥർക്ക് സമൻസ് അയച്ച് യു.എസ്. നീതിന്യായ വകുപ്പ് (ഡി.ഒ.ജെ.). വിഷയവുമായി അടുത്ത ബന്ധമുള്ള വൃത്തങ്ങളെ ഉദ്ധരിച്ച് എ.ബി.സി. ന്യൂസാണ് വാർത്ത പുറത്തുവിട്ടത്.ഇടക്കാല തിരഞ്ഞെടുപ്പ് അടുത്തിരിക്കെ, തിരഞ്ഞെടുപ്പ് നടത്തിപ്പിനെച്ചൊല്ലി ട്രംപ് ഭരണകൂടവും വിവിധ സംസ്ഥാനങ്ങളും തമ്മിലുള്ള തർക്കം ഇതോടെ കൂടുതൽ രൂക്ഷമായി. കാലിഫോർണിയയിലെ വോട്ടർ പട്ടികയിൽ അമേരിക്കൻ പൗരന്മാരല്ലാത്ത ആയിരക്കണക്കിന് ആളുകൾ ഉൾപ്പെട്ടിട്ടുണ്ടെന്ന ആരോപണം തെളിയിക്കാനാണ് ഫെഡറൽ അന്വേഷണ ഏജൻസികളുടെ ശ്രമം.വോട്ടർമാരുടെ പൗരത്വ യോഗ്യതയും പട്ടികയുടെ കൃത്യതയും പരിശോധിക്കുന്നതിന്റെ ഭാഗമായി തദ്ദേശീയ തിരഞ്ഞെടുപ്പ് ഉദ്യോഗസ്ഥരിൽ നിന്ന് രേഖകളും വിവരങ്ങളും ആവശ്യപ്പെട്ടിട്ടുണ്ട്. എന്നാൽ, വോട്ടർ പട്ടികയിൽ ക്രമക്കേട് നടന്നതായി തെളിയിക്കുന്ന അന്തിമ റിപ്പോർട്ടുകൾ ഇതുവരെ പുറത്തുവന്നിട്ടില്ല.അമേരിക്കയിൽ തിരഞ്ഞെടുപ്പ് നടത്തിപ്പിന്റെ പൂർണ്ണ ചുമതല സംസ്ഥാനങ്ങൾക്കാണെന്നിരിക്കെ, വോട്ടർ പട്ടികയിൽ ഫെഡറൽ സർക്കാർ നടത്തുന്ന ഇടപെടൽ വലിയ അധികാരപരിധി തർക്കങ്ങൾക്കും വഴിതുറന്നിട്ടുണ്ട്. അന്വേഷണം പുരോഗമിക്കുന്ന മുറയ്ക്ക് വാർത്തയിൽ കൂടുതൽ വിവരങ്ങൾ ലഭ്യമാക്കുമെന്ന് എ.ബി.സി. ന്യൂസ് വ്യക്തമാക്കി.

​

​

​