ഇന്ത്യയിലെ പ്രമുഖ വിമാനക്കമ്പനികളിലൊന്നായ ഇൻഡിഗോയ്ക്ക് പ്രവർത്തനപരമായ ബുദ്ധിമുട്ടുകൾ തുടരുന്നു. വ്യാഴാഴ്ച രാജ്യത്തുടനീളം 550 വിമാനങ്ങളാണ് എയർലൈൻ റദ്ദാക്കിയത്. ആകെ റദ്ദാക്കിയ വിമാനങ്ങളിൽ 191 സർവീസുകൾ ഡൽഹി, മുംബൈ, അഹമ്മദാബാദ്, ഹൈദരാബാദ് എന്നിവിടങ്ങളിൽ നിന്നുള്ളവയായിരുന്നു, ഇത് വിമാനത്താവളങ്ങളിൽ വലിയ ആശയക്കുഴപ്പത്തിന് വഴിവെച്ചു. നിലവിലെ പ്രതിസന്ധിയിൽ എയർലൈൻസ് പ്രസ്താവന പുറത്തിറക്കി.

"കഴിഞ്ഞ രണ്ട് ദിവസങ്ങളിലായി ഇൻഡിഗോയുടെ ശൃംഖലയിലും പ്രവർത്തനങ്ങളിലും വ്യാപകമായ തടസ്സങ്ങൾ നേരിട്ടു. ഈ സംഭവങ്ങൾ മൂലം ബുദ്ധിമുട്ട് നേരിട്ട എല്ലാ ഉപഭോക്താക്കളോടും വ്യവസായ പങ്കാളികളോടും ഞങ്ങൾ ഹൃദയപൂർവ്വം ക്ഷമ ചോദിക്കുന്നു. ഈ കാലതാമസത്തിൻ്റെ ആഘാതം കുറയ്ക്കാനും പ്രവർത്തനങ്ങൾ സാധാരണ നിലയിലാക്കാനും സിവിൽ ഏവിയേഷൻ മന്ത്രാലയം (MOCA), ഡി.ജി.സി.എ., ബി.സി.എ.എസ്., എ.എ.ഐ., വിമാനത്താവള ഓപ്പറേറ്റർമാർ എന്നിവരുടെ പിന്തുണയോടെ ഇൻഡിഗോ ടീമുകൾ പരിശ്രമിക്കുകയാണ്. ഞങ്ങളുടെ ഉപഭോക്താക്കളെ ഷെഡ്യൂൾ ചെയ്ത വിമാനങ്ങളിലെ മാറ്റങ്ങളെക്കുറിച്ച് അറിയിക്കുന്നത് തുടരുകയും ഏറ്റവും പുതിയ സ്റ്റാറ്റസ് പരിശോധിക്കാൻ ഉപദേശിക്കുകയും ചെയ്യുന്നു," ഇൻഡിഗോ പ്രസ്താവനയിൽ പറഞ്ഞു.