ലോകത്ത് പ്രകൃതിയുടെ അത്ഭുതങ്ങൾ നിരവധിയാണ്. അതിൽ ഏറ്റവും കൗതുകമുണർത്തുന്ന ഒന്നാണ് അഡ്രിയാട്ടിക് കടലിലെ ക്രൊയേഷ്യൻ തീരത്തുള്ള ‘ഗാലെഷ്ജാക്ക്’ (Galešnjak) എന്ന കൊച്ചുദ്വീപ്. മനുഷ്യന്റെ കൈയൊപ്പൊന്നുമില്ലാതെ പ്രകൃതി കൃത്യമായ ഹൃദയത്തിന്റെ ആകൃതിയിൽ രൂപപ്പെടുത്തിയിരിക്കുന്ന ഈ ദ്വീപ് ഇന്ന് ലോകമെമ്പാടുമുള്ള സഞ്ചാരികളുടെ ശ്രദ്ധാകേന്ദ്രമാണ്. 0.132 ചതുരശ്ര കിലോമീറ്റർ മാത്രം വിസ്തൃതിയുള്ള ഈ അപൂർവ്വ ഭൂപ്രകൃതിക്ക് പിന്നിൽ ആയിരക്കണക്കിന് വർഷങ്ങളുടെ ചരിത്രവുമുണ്ട്.പ്രകൃതിദത്തമായ മണ്ണൊലിപ്പും കടലിലെ ശക്തമായ അടിയൊഴുക്കുകളുമാണ് പതിനായിരക്കണക്കിന് വർഷങ്ങൾകൊണ്ട് ഈ ദ്വീപിന് ഈ പ്രത്യേക ആകൃതി സമ്മാനിച്ചത്. 1.55 കിലോമീറ്റർ തീരപ്രദേശമുള്ള ഈ ദ്വീപിന്റെ ഉയർന്ന ഭാഗം സമുദ്രനിരപ്പിൽ നിന്ന് 36 മീറ്റർ ഉയരത്തിലാണ് സ്ഥിതി ചെയ്യുന്നത്. ഒലീവ് മരങ്ങളും അത്തിമരങ്ങളും കാട്ടുചെടികളും നിറഞ്ഞ ഇവിടെ ചെറിയ മുയലുകളുടെയും കാട്ടുപ്രാവുകളുടെയും വലിയ കൂട്ടങ്ങളുമുണ്ട്. നപ്പോളിയന്റെ കാലത്തെ ഒരു കാർട്ടോഗ്രാഫർ 1806-ലെ അറ്റ്‌ലസിൽ ഈ ദ്വീപ് രേഖപ്പെടുത്തിയിട്ടുണ്ടെങ്കിലും, 2009-ൽ ഗൂഗിൾ എർത്ത് (Google Earth) വഴി ചിത്രങ്ങൾ പുറത്തുവന്നതോടെയാണ് ഇത് ലോകപ്രശസ്തി നേടുന്നത്.നിലവിൽ ആൾത്താമസമില്ലാത്ത ഈ ദ്വീപിന് 7,000 വർഷത്തിലധികം പഴക്കമുള്ള ചരിത്രമുണ്ടെന്നാണ് പുതിയ കണ്ടെത്തലുകൾ വ്യക്തമാക്കുന്നത്. 2019-ൽ സദാർ സർവകലാശാല നടത്തിയ പുരാവസ്തു ഗവേഷണത്തിൽ നിയോലിത്തിക് യുഗത്തിലെ മനുഷ്യവാസത്തിന്റെ തെളിവുകൾ ഇവിടെിനിന്ന് കണ്ടെത്തിയിരുന്നു. അന്നത്തെ കാലത്ത് ഈ ദ്വീപിനെ സമീപത്തുള്ള റിചുൽ ദ്വീപുമായാണ് ഒരു കൽക്കെട്ട് വഴി ബന്ധിപ്പിച്ചിരുന്നത്. ജുറേഷ്കോ കുടുംബത്തിന്റെ സ്വകാര്യ ഉടമസ്ഥതയിലുള്ള ഈ ദ്വീപിൽ യാതൊരുവിധ വാണിജ്യ കെട്ടിടങ്ങളോ ടൂറിസം സൗകര്യങ്ങളോ ഇല്ല. സഞ്ചാരികൾക്ക് സദാർ അല്ലെങ്കിൽ പഷ്മാൻ എന്നിവിടങ്ങളിൽ നിന്ന് സ്വന്തമായി ബോട്ട് വാടകയ്ക്കെടുത്ത് മാത്രമേ ഇവിടെ എത്തിച്ചേരാൻ സാധിക്കൂ.ആധുനിക സൗകര്യങ്ങളൊന്നുമില്ലെങ്കിലും പ്രകൃതി സൗന്ദര്യവും ചരിത്ര പ്രാധാന്യവും കൊണ്ട് സഞ്ചാരികളെ ഒരുപോലെ ആകർഷിക്കുന്ന ഒന്നാണ് ഗാലെഷ്ജാക്ക് ദ്വീപ്. പ്രകൃതിയുടെ ഈ വിസ്മയക്കാഴ്ച തേടി ഒട്ടനവധി ആളുകളാണ് ഓരോ വർഷവും ഈ ഹൃദയഭൂമിയിലേക്ക് എത്തിച്ചേരുന്നത്.