തിരഞ്ഞെടുക്കപ്പെട്ട ഒരു ഗവൺമെന്റിന്റെ തലവനായി ഇന്ത്യയിൽ ഏറ്റവും കൂടുതൽ കാലം സേവനമനുഷ്ഠിച്ച വ്യക്തിയെന്ന റെക്കോർഡ് ഇനി പ്രധാനമന്ത്രി നരേന്ദ്ര മോദിക്ക്. മുഖ്യമന്ത്രിയായും പ്രധാനമന്ത്രിയായും തന്റെ ഔദ്യോഗിക ജീവിതത്തിൽ 8,931 ദിവസങ്ങൾ പൂർത്തിയാക്കിയാണ് അദ്ദേഹം ഈ ചരിത്രനേട്ടം കൈവരിച്ചത്. ഇതോടെ സിക്കിം മുൻ മുഖ്യമന്ത്രി പവൻ കുമാർ ചാംലിംഗിന്റെ 8,930 ദിവസങ്ങൾ എന്ന റെക്കോർഡാണ് നരേന്ദ്ര മോദി മറികടന്നത്.

2001 ഒക്ടോബർ 7-ന് ഗുജറാത്ത് മുഖ്യമന്ത്രിയായി ആദ്യമായി അധികാരമേറ്റ നരേന്ദ്ര മോദി, 13 വർഷത്തിലധികം ആ പദവിയിൽ തുടർന്നു. തുടർന്ന് 2014 മെയ് 21-ന് മുഖ്യമന്ത്രി സ്ഥാനം രാജിവെച്ച് ദേശീയ രാഷ്ട്രീയത്തിലേക്ക് പ്രവേശിച്ച അദ്ദേഹം 2014 മെയ് 26-ന് ഇന്ത്യയുടെ 14-ാമത് പ്രധാനമന്ത്രിയായി സത്യപ്രതിജ്ഞ ചെയ്തു.ലോക്‌സഭയിൽ വ്യക്തമായ ഭൂരിപക്ഷം നേടുന്ന ആദ്യ കോൺഗ്രസ് ഇതര നേതാവായ മോദി 2014, 2019, 2024 പൊതുതിരഞ്ഞെടുപ്പുകളിൽ തുടർച്ചയായി വിജയിച്ച് അധികാരം നിലനിർത്തി. ഏറ്റവും കൂടുതൽ കാലം ഗുജറാത്ത് മുഖ്യമന്ത്രിയായിരുന്ന വ്യക്തിയും മുൻപ് മുഖ്യമന്ത്രിയായിരുന്നവരിൽ ഏറ്റവും കൂടുതൽ കാലം പ്രധാനമന്ത്രി പദവിയിലിരിക്കുന്ന വ്യക്തിയും നരേന്ദ്ര മോദിയാണ്.പ്രധാനമന്ത്രിയുടെ ഈ നാഴികക്കല്ലിൽ ബിജെപി നേതാക്കളും എൻഡിഎ പങ്കാളികളും അഭിനന്ദനങ്ങൾ അറിയിച്ചു. "മോദിജിയുടെ പതിറ്റാണ്ടുകൾ നീണ്ട സേവനം സ്വന്തമായി ഒരു യുഗം തന്നെ സൃഷ്ടിച്ചിരിക്കുന്നു. പാവപ്പെട്ടവർക്ക് അവരുടെ അവകാശങ്ങൾ നൽകുന്നതിലും വികസനത്തിന്റെ പുതിയ നാഴികക്കല്ലുകൾ സ്ഥാപിക്കുന്നതിലും അന്താരാഷ്ട്ര തലത്തിൽ രാജ്യത്തിന്റെ അഭിമാനം ഉയർത്തുന്നതിലും മോദി യുഗം ഇന്ത്യയെ തിരിച്ചറിയാൻ കഴിയാത്തവിധം മാറ്റിമറിച്ചു," എന്ന് കേന്ദ്ര ആഭ്യന്തര മന്ത്രി അമിത് ഷാ കുറിച്ചു.