ന്യൂഡൽഹി: ഉഭയകക്ഷി ബന്ധം ശക്തിപ്പെടുത്തുന്നതിന്റെ ഭാഗമായി മൂന്ന് ദിവസത്തെ സന്ദർശനത്തിനായി ദക്ഷിണ കൊറിയൻ പ്രസിഡന്റ് ലീ ജെയ്-മ്യുങ് ഇന്ത്യയിലെത്തി. പ്രസിഡന്റായി ചുമതലയേറ്റ ശേഷമുള്ള അദ്ദേഹത്തിന്റെ ആദ്യ ഇന്ത്യൻ സന്ദർശനമാണിത്. സന്ദർശനത്തിന്റെ രണ്ടാം ദിനമായ ഇന്ന് രാഷ്ട്രപതി ഭവനിൽ വെച്ച് രാഷ്ട്രപതി ദ്രൗപതി മുർമുവും പ്രധാനമന്ത്രി നരേന്ദ്ര മോദിയും ചേർന്ന് അദ്ദേഹത്തിന് ആചാരപരമായ സ്വീകരണം നൽകി.

ഔദ്യോഗിക സ്വീകരണത്തിന് ശേഷം പ്രസിഡന്റ് ലീ ജെയ്-മ്യുങ്ങും പത്നിയും രാജ്ഘട്ടിലെത്തി മഹാത്മാഗാന്ധിയുടെ സമാധിയിൽ പുഷ്പചക്രം അർപ്പിച്ചു. തുടർന്ന് പ്രധാനമന്ത്രി നരേന്ദ്ര മോദിയുമായി അദ്ദേഹം ഉന്നതതല ചർച്ചകൾ നടത്തി. പ്രതിരോധം, സാങ്കേതിക വിദ്യ, വ്യാപാരം തുടങ്ങിയ മേഖലകളിൽ ഇരുരാജ്യങ്ങളും തമ്മിൽ നിരവധി തന്ത്രപ്രധാന കരാറുകളിൽ ഒപ്പുവയ്ക്കുമെന്നാണ് റിപ്പോർട്ട്.

ഇന്ത്യയും ദക്ഷിണ കൊറിയയും തമ്മിലുള്ള സാമ്പത്തിക ബന്ധം വലിയ വളർച്ചയുടെ പാതയിലാണെന്ന് കണക്കുകൾ സൂചിപ്പിക്കുന്നു. 2010-ൽ ഇരുരാജ്യങ്ങളും സാമ്പത്തിക പങ്കാളിത്ത കരാറിൽ (CEPA) ഒപ്പുവെക്കുമ്പോൾ 14.2 ബില്യൺ ഡോളറായിരുന്ന ഉഭയകക്ഷി വ്യാപാരം, 2024-25 കാലയളവിൽ 26.89 ബില്യൺ ഡോളറായി ഉയർന്നു. വ്യാപാര രംഗത്തുണ്ടായ ഈ 90 ശതമാനം വർധനവ് കണക്കിലെടുത്ത് നിലവിലുള്ള കരാറുകൾ പരിഷ്കരിക്കാനും കൂടുതൽ നിക്ഷേപങ്ങൾ കൊണ്ടുവരാനും ചർച്ചകളിൽ തീരുമാനമാകും.

മധ്യപൂർവേഷ്യൻ സംഘർഷങ്ങൾ ആഗോളതലത്തിൽ സാമ്പത്തിക പ്രതിസന്ധി സൃഷ്ടിക്കുന്ന ഈ സാഹചര്യത്തിൽ ഇന്ത്യയും ദക്ഷിണ കൊറിയയും തമ്മിലുള്ള പങ്കാളിത്തം ഏറെ പ്രധാനമാണെന്ന് പ്രസിഡന്റ് ലീ സോഷ്യൽ മീഡിയയിൽ കുറിച്ചു. ഇൻഡോ-പസഫിക് മേഖലയിലെ സുരക്ഷാ സഹകരണവും ചർച്ചകളിൽ പ്രധാന വിഷയമാകും.കൊറിയൻ കമ്പനികൾക്ക് ഇന്ത്യയിൽ കൂടുതൽ നിക്ഷേപ സൗകര്യങ്ങൾ ഒരുക്കുന്നതിനെക്കുറിച്ചും ഐടി, അർദ്ധചാലക (Semiconductor) നിർമ്മാണ മേഖലകളിലെ സഹകരണത്തെക്കുറിച്ചും വരും ദിവസങ്ങളിൽ കൂടുതൽ പ്രഖ്യാപനങ്ങൾ ഉണ്ടായേക്കും.