തിരുവനന്തപുരം: സംസ്ഥാന കോൺഗ്രസ് പുനഃസംഘടനയിൽ തന്നെ അവഗണിച്ചതിലുള്ള കടുത്ത അമർഷം രമേശ് ചെന്നിത്തല ഹൈക്കമാൻഡിനെ അറിയിച്ചു. മുതിർന്ന നേതാവെന്ന നിലയിലുള്ള സീനിയോരിറ്റി പരിഗണിച്ചില്ലെന്ന പരാതി രാഹുൽ ഗാന്ധിയുമായാണ് അദ്ദേഹം പങ്കുവെച്ചത്. പാർട്ടി അച്ചടക്കം പാലിച്ച് മുന്നോട്ട് പോയിട്ടും തന്നെ തഴയുന്ന നിലപാടാണ് നേതൃത്വം സ്വീകരിക്കുന്നതെന്ന പരിഭവം അദ്ദേഹത്തിനുണ്ട്.പുതിയ രാഷ്ട്രീയ സാഹചര്യത്തിൽ മന്ത്രിസഭയിൽ അംഗമാകാനില്ലെന്ന് ചെന്നിത്തല വ്യക്തമാക്കിയതായാണ് സൂചന. പ്രതിഷേധ സൂചകമായി ഇന്ന് ചേരുന്ന നിയമസഭാകക്ഷി യോഗത്തിൽ നിന്നും അദ്ദേഹം വിട്ടുനിന്നേക്കും.സ്ഥാനമാനങ്ങൾ നൽകുന്നതിൽ മാനദണ്ഡങ്ങൾ പാലിച്ചില്ലെന്ന ആക്ഷേപം ചെന്നിത്തലയെ അനുകൂലിക്കുന്നവരും ഉയർത്തുന്നുണ്ട്. ലോക്സഭാ തിരഞ്ഞെടുപ്പ് മുന്നൊരുക്കങ്ങൾ നടക്കുന്നതിനിടെ മുതിർന്ന നേതാവ് വിയോജിപ്പുമായി രംഗത്തെത്തിയത് കോൺഗ്രസ് കേന്ദ്രങ്ങളിൽ വലിയ ചർച്ചയായിട്ടുണ്ട്. ചെന്നിത്തലയുടെ വിയോജിപ്പ് പരിഹരിക്കാൻ ഹൈക്കമാൻഡ് ഇടപെടൽ ഉണ്ടാകുമോ എന്നാണ് രാഷ്ട്രീയ കേരളം ഉറ്റുനോക്കുന്നത്.