ഹോർമുസ് കടലിടുക്കിൽ യുഎഇയുടെ രണ്ട് എണ്ണക്കപ്പലുകൾക്ക് നേരെ ഇറാന്റെ ക്രൂസ് മിസൈൽ ആക്രമണം. ആക്രമണത്തിൽ കപ്പലിലുണ്ടായിരുന്ന ഒരു ഇന്ത്യൻ നാവികൻ കൊല്ലപ്പെടുകയും എട്ട് പേർക്ക് പരിക്കേൽക്കുകയും ചെയ്തതായി യുണൈറ്റഡ് അറബ് എമിറേറ്റ്സ് (UAE) പ്രതിരോധ മന്ത്രാലയം സ്ഥിരീകരിച്ചു.മൊംബാസ (Mombasa), അൽ ബഹിയ (Al Bahiyah) എന്നീ രണ്ട് എണ്ണക്കപ്പലുകൾക്ക് നേരെയാണ് ആക്രമണമുണ്ടായത്. ഒമാൻ പ്രാദേശിക സമുദ്രാതിർത്തിയിലെ കടലിടുക്കിന്റെ തെക്കൻ പാതയിലൂടെ സഞ്ചരിക്കുമ്പോഴാണ് കപ്പലുകൾ ലക്ഷ്യമിട്ട് മിസൈലുകൾ പതിച്ചതെന്ന് മന്ത്രാലയം അറിയിച്ചു. ഇതിൽ മൊംബാസ എന്ന കപ്പലിൽ സേവനമനുഷ്ഠിച്ചിരുന്ന ഇന്ത്യൻ പൗരനാണ് ജീവൻ നഷ്ടമായത്.പരിക്കേറ്റ എട്ട് പേരിൽ നാല് പേരുടെ നില അതീവ ഗുരുതരമാണ്. പരിക്കേറ്റവരിൽ ആറ് പേർ ഇന്ത്യൻ പൗരന്മാരും ബാക്കി രണ്ട് പേർ ഉക്രൈൻ സ്വദേശികളുമാണെന്ന് മന്ത്രാലയം വ്യക്തമാക്കി.മിസൈൽ ആക്രമണത്തെത്തുടർന്ന് രണ്ട് ടാങ്കറുകളിലും വൻ തീപിടിത്തമുണ്ടാവുകയും കപ്പലുകൾക്ക് വലിയ നാശനഷ്ടങ്ങൾ സംഭവിക്കുകയും ചെയ്തു. എന്നാൽ, ലോകത്തിലെ ഏറ്റവും തിരക്കേറിയ കപ്പൽപ്പാതകളിലൊന്നായ ഇവിടെ കപ്പലിലെ ജീവനക്കാർ കൃത്യസമയത്ത് ഇടപെട്ട് തീയണച്ചതിനാൽ വലിയൊരു ദുരന്തം ഒഴിവാകുകയായിരുന്നു. ആക്രമണത്തെ ശക്തമായി അപലപിച്ച യുഎഇ, ഇത് അന്താരാഷ്ട്ര നിയമങ്ങളുടെ ഗുരുതരമായ ലംഘനമാണെന്ന് വിശേഷിപ്പിച്ചു. സംഭവത്തോട് പ്രതികരിക്കാനുള്ള അവകാശം തങ്ങളിൽ നിക്ഷിപ്തമാണെന്നും തങ്ങളുടെ പരമാധികാരവും സുരക്ഷയും സമുദ്ര താൽപ്പര്യങ്ങളും സംരക്ഷിക്കുന്നതിന് ആവശ്യമായ എല്ലാ നടപടികളും സ്വീകരിക്കുമെന്നും പ്രതിരോധ മന്ത്രാലയം മുന്നറിയിപ്പ് നൽകി.ഏതൊരു ഭീഷണിയെയും നേരിടാനും പ്രാദേശിക സുസ്ഥിരതയെ തകർക്കുന്ന നടപടികൾക്ക് നിർണ്ണായകമായി മറുപടി നൽകാനും യുഎഇ പൂർണ്ണ സജ്ജമാണ്," ഔദ്യോഗിക പ്രസ്താവനയിൽ പറയുന്നു.അമേരിക്കയും ഇറാനും തമ്മിലുള്ള സംഘർഷം ശക്തമാകുന്നതിനിടയിലാണ് ഗൾഫ് മേഖലയിൽ കടുത്ത ആശങ്ക സൃഷ്ടിച്ചുകൊണ്ട് ഈ പുതിയ ആക്രമണം ഉണ്ടായിരിക്കുന്നത്. പേർഷ്യൻ ഉൾക്കടലിനെയും അറബിക്കടലിനെയും ബന്ധിപ്പിക്കുന്ന ഇടുങ്ങിയ പാതയായ ഹോർമുസ് കടലിടുക്ക് വീണ്ടും ഇരുരാജ്യങ്ങളും തമ്മിലുള്ള ഏറ്റുമുട്ടലിന്റെ പ്രധാന കേന്ദ്രമായി മാറിയിരിക്കുകയാണ്.ഇതിനിടെ, ഒമാനിലെ ഖൽഹാത്തിൽ നിന്ന് ഏകദേശം 40 നോട്ടിക്കൽ മൈൽ വടക്കുകിഴക്കായി സഞ്ചരിക്കുകയായിരുന്ന ഒരു ടാങ്കറിന് നേരെ തിരിച്ചറിയാത്ത വസ്തു പതിച്ചതായി യുണൈറ്റഡ് കിംഗ്ഡം മാരിടൈം ട്രേഡ് ഓപ്പറേഷൻസ് (UKMTO) ഏജൻസിയും റിപ്പോർട്ട് ചെയ്തിട്ടുണ്ട്. ഈ ആഘാതത്തിൽ കപ്പലിന്റെ സ്റ്റാർബോർഡ് ഭാഗത്തുള്ള എഞ്ചിൻ റൂമിന് കേടുപാടുകൾ സംഭവിച്ചതായും എന്നാൽ ജീവനക്കാരെല്ലാം സുരക്ഷിതരാണെന്നും ഏജൻസി അറിയിച്ചു.