Restrictions on tourism in Idukki: ഇടുക്കി കല്ലാർകുട്ടി ഡാമിന്റെ ഒരു ഷട്ടർ തുറന്നു. ഡാമിന്റെ വൃഷ്ടി പ്രദേശത്ത് മഴ തുടരുന്ന സാഹചര്യത്തിലാണ് നടപടി. നിയന്ത്രിത അളവിൽ ഷട്ടറുകൾ തുറന്നാണ് വെള്ളം പുറത്തേക്ക് ഒഴുക്കുന്നത്.

മുതിരപ്പുഴയാറിന്റേയും പെരിയാറിന്റേയും തീരപ്രദേശത്തുള്ളവർ ജാഗ്രത പാലിക്കണമന്നു നിർദ്ദേശമുണ്ട്. ഇടുക്കിയിലെ അപകട സാധ്യതയുള്ള പ്രദേശങ്ങളിലെ റോഡ് നിർമാണ പ്രവർത്തനങ്ങൾ താത്കാലികമായി നിർത്തി വയ്ക്കാനും കലക്ടർ ഉത്തരവിട്ടു.

ഇടുക്കിയിൽ വിനോദ സഞ്ചാരത്തിന് നിയന്ത്രണം ഏർപ്പെടുത്തി. ജല വിനോദങ്ങൾ, ട്രക്കിങ്, സഹസിക വിനോദ സഞ്ചാര പരിപാടികൾ എന്നിവയ്ക്കും നിരോധനമുണ്ട്

അതേസമയം കേരളത്തിൽ കാലവർഷം എത്തി. കഴിഞ്ഞ 16 വർഷത്തിനിടയിലെ ഏറ്റവും നേരത്തെയായിരിക്കും ഈ വർഷം കേരളത്തിൽ കാലവർഷം എത്തുന്നത്. ജൂൺ 1 ന് ആരംഭിക്കുന്ന പതിവിന് എട്ട് ദിവസം മുമ്പാണ് ഇന്ന് കേരളത്തിൽ മൺസൂൺ എത്തിയതെന്ന് കേന്ദ്ര കാലാവസ്ഥാ വകുപ്പ് (ഐഎംഡി) ശനിയാഴ്ച അറിയിച്ചു.

മൺസൂൺ ആരംഭിക്കുന്നതിന് അനുകൂലമായ എല്ലാ സാഹചര്യങ്ങളും സംസ്ഥാനത്ത് വികസിച്ചുവന്നിട്ടുണ്ട്. കഴിഞ്ഞ രണ്ട് ദിവസമായി കേരളത്തിലെ പല ഭാഗങ്ങളിലും ശക്തമായ മഴ പെയ്യുകയാണ്. 2009 ലും 2001 ലും ആണ് സംസ്ഥാനത്ത് അവസാനമായി മൺസൂൺ ഇത്രയും നേരത്തെ എത്തിയത്, അന്ന് മെയ് 23 നാണ് സംസ്ഥാനത്ത് കാലവർഷമെത്തിയത്