ഇറാനിലെ തന്ത്രപ്രധാനമായ ആണവ കേന്ദ്രങ്ങളിൽനിന്ന് യുറേനിയം പിടിച്ചെടുക്കാൻ അമേരിക്കൻ സൈന്യം അതീവ സങ്കീർണ്ണവും അപകടസാധ്യതയേറിയതുമായ ഒരു പദ്ധതി തയ്യാറാക്കിയതായി വാഷിങ്ടൺ പോസ്റ്റ് റിപ്പോർട്ട് ചെയ്യുന്നു. പ്രസിഡന്റ് ഡോണൾഡ് ട്രംപിന്റെ നേരിട്ടുള്ള നിർദ്ദേശപ്രകാരമാണ് ഈ നീക്കം. ആയിരക്കണക്കിന് അമേരിക്കൻ സൈനികരെ ഇറാനിൽ വിന്യസിച്ചുകൊണ്ട് നടപ്പിലാക്കാൻ ഉദ്ദേശിക്കുന്ന ഈ പദ്ധതി, മുൻപെങ്ങും ഇല്ലാത്തവിധം സങ്കീർണ്ണമാണെന്നാണ് വിലയിരുത്തപ്പെടുന്നത്.

ഇസ്ഫഹാൻ, നതാൻസ് തുടങ്ങിയ ഇറാനിയൻ ആണവ നിലയങ്ങളിൽ സംഭരിച്ചിരിക്കുന്ന ഏകദേശം 454 കിലോഗ്രാം (ആയിരം പൗണ്ടിലധികം) യുറേനിയം കൈക്കലാക്കുകയാണ് അമേരിക്കയുടെ പ്രധാന ലക്ഷ്യം. മുൻപ് നടന്ന വ്യോമാക്രമണങ്ങളിൽ തകർന്ന കെട്ടിടാവശിഷ്ടങ്ങൾക്കിടയിലാണ് ഈ ആണവശേഖരം ഉള്ളതെന്നാണ് സൂചന. അതിനാൽ തന്നെ ഇവ സുരക്ഷിതമായി വീണ്ടെടുക്കുക എന്നത് വലിയ വെല്ലുവിളിയായിരിക്കും. സാധാരണഗതിയിലുള്ള ആക്രമണങ്ങളിൽ നിന്ന് വ്യത്യസ്തമായി, ശത്രുരാജ്യത്തിന്റെ മണ്ണിലേക്ക് നേരിട്ട് കടന്നുകയറി സൈനികർ നടത്തുന്ന ദൗത്യമാണിതെന്ന് ഈ മേഖലയിലെ വിദഗ്ധർ ചൂണ്ടിക്കാട്ടുന്നു.അതീവ സൂക്ഷ്മതയോടെയും സാവധാനത്തിലും മാത്രം പൂർത്തിയാക്കാൻ കഴിയുന്ന ഈ ദൗത്യം സൈനികർക്ക് വലിയ ശാരീരിക-സാങ്കേതിക ഭീഷണികൾ ഉയർത്തുന്നുണ്ട്. അതേസമയം, സൈനിക നടപടിയിലൂടെ യുറേനിയം പിടിച്ചെടുക്കാൻ സാധിക്കുമെങ്കിലും ഒരു വെടിനിർത്തൽ വേളയിൽ അന്താരാഷ്ട്ര അറ്റോമിക് എനർജി ഏജൻസി (IAEA) ഉദ്യോഗസ്ഥരെ ഉപയോഗിച്ച് ഇത് നടപ്പിലാക്കുന്നതാകും കൂടുതൽ ഉചിതമെന്ന് മുൻ അമേരിക്കൻ ജനറൽ ജോസഫ് വോട്ടൽ അഭിപ്രായപ്പെട്ടു. സൈനികമായ കടന്നുകയറ്റത്തേക്കാൾ അന്താരാഷ്ട്ര ഏജൻസികളുടെ ഇടപെടൽ ഇത്തരം സാഹചര്യങ്ങളിൽ കൂടുതൽ ഫലപ്രദമാകുമെന്നാണ് അദ്ദേഹത്തിന്റെ വിലയിരുത്തൽ.