തദ്ദേശീയ പ്രതിരോധ നിർമ്മാണ രംഗത്ത് വൻ നേട്ടം കൈവരിച്ചുകൊണ്ട് ഇന്ത്യ വികസിപ്പിച്ചെടുത്ത വിക്രം വി.ടി-21 കവചിത വാഹനത്തിന് അന്താരാഷ്ട്ര തലത്തിലുള്ള സ്റ്റാങ് ലെവൽ 5 സുരക്ഷാ സർട്ടിഫിക്കേഷൻ ലഭിച്ചു. ഡി.ആർ.ഡി.ഒ രൂപകൽപ്പന ചെയ്ത ഈ വാഹനത്തിന്റെ ഏറ്റവും വലിയ സവിശേഷത ഇതിന്റെ ഭാരം കുറഞ്ഞതും എന്നാൽ സ്റ്റീലിനേക്കാൾ കരുത്തുള്ളതുമായ കോമ്പോസിറ്റ് ഹൾ ആണ്. പൂർണ്ണമായും ഇന്ത്യയിൽ തന്നെ വികസിപ്പിച്ചെടുത്ത ഈ സാങ്കേതികവിദ്യ വാഹനത്തിന് ഉയർന്ന വേഗതയും മികച്ച മൈലേജും നൽകുന്നു. ഇതോടെ ഉയർന്ന സുരക്ഷാ മാനദണ്ഡങ്ങളുള്ള കവചിത വാഹനങ്ങൾ നിർമ്മിക്കുന്ന ചുരുക്കം ചില രാജ്യങ്ങളുടെ പട്ടികയിൽ ഇന്ത്യയും ഇടംപിടിച്ചു.

യുദ്ധഭൂമിയിലെ അതിതീവ്രമായ ആക്രമണങ്ങളെ പ്രതിരോധിക്കാൻ ശേഷിയുള്ള രീതിയിലാണ് വിക്രം വിടി-21 ഒരുക്കിയിരിക്കുന്നത്. 25 എം.എം വലിപ്പമുള്ള ഷെല്ലാക്രമണങ്ങളെയും 500 മീറ്റർ അകലെ നിന്നുള്ള എ.പി.ഡി.എസ് വെടിയുണ്ടകളെയും തടയാൻ ഇതിന് സാധിക്കും. 155 എം.എം വലിപ്പമുള്ള പീരങ്കി ഷെല്ലുകൾ വെറും 25 മീറ്റർ അടുത്തുവന്നു പതിച്ചാൽ പോലും വാഹനത്തിനുള്ളിലെ സൈനികർ സുരക്ഷിതരായിരിക്കും എന്നതാണ് ഇതിന്റെ പ്രത്യേകത. കൂടാതെ, മൈനുകളെയും ശക്തമായ സ്‌ഫോടനങ്ങളെയും അതിജീവിക്കാൻ സഹായിക്കുന്ന അത്യാധുനിക മോഡുലാർ ബ്ലാസ്റ്റ് പ്രൊട്ടക്ഷൻ സംവിധാനവും ഇതിൽ ഉൾപ്പെടുത്തിയിട്ടുണ്ട്.

ടാറ്റ അഡ്വാൻസ്ഡ് സിസ്റ്റംസ്, ഭാരത് ഫോർജ് എന്നിവയുമായി സഹകരിച്ച് ഡി.ആർ.ഡി.ഒ വികസിപ്പിച്ച ഈ വാഹനത്തിൽ മാരകമായ ആയുധശേഖരമാണുള്ളത്. റിമോട്ട് കൺട്രോൾ വഴി പ്രവർത്തിപ്പിക്കാവുന്ന 30 എം.എം പീരങ്കിയും ആന്റി-ടാങ്ക് ഗൈഡഡ് മിസൈലുകളും വിക്രത്തിന് കരുത്തേകുന്നു. സൈനികർക്ക് വാഹനത്തിന്റെ സുരക്ഷിതത്വത്തിലിരുന്ന് തന്നെ ശത്രുക്കളെ ലക്ഷ്യം വെക്കാം. കരയിൽ അതിവേഗത്തിൽ സഞ്ചരിക്കാൻ ശേഷിയുള്ള ഇതിന് ഹൈഡ്രോ-ജെറ്റ് പ്രൊപ്പൽഷൻ സാങ്കേതികവിദ്യ ഉപയോഗിച്ച് വെള്ളത്തിലൂടെയും സുഗമമായി നീങ്ങാൻ സാധിക്കും.

പഴയ സോവിയറ്റ് കാലഘട്ടത്തിലെ ബി.എം.പി-2 വാഹനങ്ങൾക്ക് പകരമായി ഇന്ത്യൻ സൈന്യത്തിന്റെ ഭാഗമാകാൻ ഒരുങ്ങുന്ന വിക്രം വിടി-21, പ്രതിരോധ മേഖലയിലെ ആത്മനിർഭർ ഭാരത് പദ്ധതിയുടെ മികച്ച ഉദാഹരണമാണ്. ഏകദേശം 65 ശതമാനത്തോളം തദ്ദേശീയ ഉൽപ്പന്നങ്ങൾ ഉപയോഗിച്ചാണ് ഇതിന്റെ നിർമ്മാണം പൂർത്തിയാക്കിയിരിക്കുന്നത്. പുതിയ ആഗോള സുരക്ഷാ അംഗീകാരം ലഭിച്ചതോടെ വിദേശ രാജ്യങ്ങളിലേക്ക് ഈ വാഹനങ്ങൾ കയറ്റുമതി ചെയ്യാനുള്ള സാധ്യതകളും വർദ്ധിച്ചിരിക്കുകയാണ്. ഇത് ഇന്ത്യൻ പ്രതിരോധ കയറ്റുമതി മേഖലയ്ക്ക് വലിയൊരു ഊർജ്ജമാകും.