കേന്ദ്ര മന്ത്രിസഭാ പുനഃസംഘടനയും വിപുലീകരണവും നടക്കുമെന്ന അഭ്യൂഹങ്ങൾക്കിടയിൽ മെയ് 21-ന് കേന്ദ്ര മന്ത്രിസഭാ കൗൺസിലിന്റെ (Council of Ministers) നിർണ്ണായക യോഗം വിളിച്ച് പ്രധാനമന്ത്രി നരേന്ദ്ര മോദി. മോദി 3.0 സർക്കാരിൽ വലിയ മാറ്റങ്ങൾ ഉണ്ടായേക്കുമെന്ന സൂചനകൾക്കിടയിലാണ് ഈ സുപ്രധാന നീക്കം. ഔദ്യോഗിക വൃത്തങ്ങളാണ് വ്യാഴാഴ്ച ഇക്കാര്യം അറിയിച്ചത്.കേന്ദ്ര കാബിനറ്റ് മന്ത്രിമാർ, സ്വതന്ത്ര ചുമതലയുള്ള സഹമന്ത്രിമാർ, സഹമന്ത്രിമാർ എന്നിവരെല്ലാം യോഗത്തിൽ പങ്കെടുക്കുമെന്നാണ് കരുതുന്നത്. വിവിധ സർക്കാർ പദ്ധതികളുടെയും പരിപാടികളുടെയും നടത്തിപ്പ് അവലോകനം ചെയ്യുന്നതിനൊപ്പം വിവിധ മന്ത്രാലയങ്ങളുടെയും വകുപ്പുകളുടെയും പ്രവർത്തനം യോഗം വിലയിരുത്തും.2024 ജൂൺ 10-ന് അധികാരമേറ്റ മോദി 3.0 സർക്കാരിന്റെ ഒന്നാം വാർഷികത്തിന് മുന്നോടിയായാണ് ഈ യോഗം നടക്കുന്നത് എന്നത് രാഷ്ട്രീയ പ്രാധാന്യം വർദ്ധിപ്പിക്കുന്നു. ജൂൺ രണ്ടാം വാരത്തോടെ മന്ത്രിസഭാ വിപുലീകരണവും അഴിച്ചുപണിയും നടന്നേക്കുമെന്നാണ് സൂചന. പശ്ചിമ ബംഗാൾ, അസം നിയമസഭാ തിരഞ്ഞെടുപ്പുകളിൽ ബിജെപി കാഴ്ചവെച്ച മികച്ച പ്രകടനവും പുതുച്ചേരിയിൽ എൻഡിഎ സർക്കാർ തിരിച്ചെത്തിയതും മന്ത്രിസഭാ മാറ്റങ്ങളിൽ പ്രതിഫലിക്കാനിടയുണ്ട്.ഭരണപരമായ മുൻഗണനകളും നയപരമായ തീരുമാനങ്ങളും ചർച്ച ചെയ്യുന്നതിനായി പ്രധാനമന്ത്രി കൃത്യമായ ഇടവേളകളിൽ മന്ത്രിസഭാ കൗൺസിൽ യോഗം വിളിക്കാറുണ്ട്. എന്നാൽ, നിലവിലെ സാഹചര്യത്തിൽ മന്ത്രിസഭയിൽ ഉണ്ടാകാൻ സാധ്യതയുള്ള മാറ്റങ്ങളെക്കുറിച്ചുള്ള ഊഹാപോഹങ്ങൾക്കിടയിൽ മെയ് 21-ലെ യോഗത്തെ രാഷ്ട്രീയ ലോകം അതീവ ജാഗ്രതയോടെയാണ് ഉറ്റുനോക്കുന്നത്.