മെറ്റായുടെ ഉടമസ്ഥതയിലുള്ള ജനപ്രിയ മെസേജിങ് പ്ലാറ്റ്‌ഫോമായ വാട്സാപ്പ്, തങ്ങളുടെ പുതിയ 'യൂസർനെയിം' (Username) ഫീച്ചറുമായി ബന്ധപ്പെട്ട് കേന്ദ്ര സർക്കാർ അയച്ച നോട്ടീസിന് മറുപടി നൽകിയതായി റിപ്പോർട്ട്. ഈ പ്രതികരണം കേന്ദ്ര സർക്കാർ നിലവിൽ വിശദമായി പരിശോധിച്ച് വരികയാണെന്ന് ഔദ്യോഗിക വൃത്തങ്ങളെ ഉദ്ധരിച്ച് വാർത്താ ഏജൻസിയായ പിടിഐ വ്യാഴാഴ്ച റിപ്പോർട്ട് ചെയ്തു.രാജ്യത്ത് ഓൺലൈൻ തട്ടിപ്പുകൾ, ഫിഷിംഗ്, ഡിജിറ്റൽ അറസ്റ്റ് തട്ടിപ്പുകൾ, ആൾമാറാട്ടം വഴിയുള്ള ആക്രമണങ്ങൾ എന്നിവ ഗണ്യമായി വർദ്ധിപ്പിക്കാൻ ഇടയാക്കുമെന്ന ആശങ്ക ഉന്നയിച്ച് കഴിഞ്ഞ ബുധനാഴ്ചയാണ് കേന്ദ്ര സർക്കാർ മെറ്റായ്ക്ക് നോട്ടീസ് അയച്ചത്.ഫോൺ നമ്പറുകൾ പരസ്പരം പങ്കിടാതെ തന്നെ ഉപയോക്താക്കൾക്ക് വാട്സാപ്പിൽ ആശയവിനിമയം നടത്താൻ അനുവദിക്കുന്നതാണ് ഈ പുതിയ ഫീച്ചർ. എന്നാൽ ഈ വിഷയത്തിൽ സർക്കാരുമായുള്ള കൂടിയാലോചനകൾ പൂർത്തിയാകുകയും സർക്കാരിന് പൂർണ്ണ തൃപ്തി വരികയും ചെയ്യുന്നത് വരെ ഈ ഫീച്ചർ രാജ്യത്ത് അവതരിപ്പിക്കരുതെന്ന് കേന്ദ്രം പ്ലാറ്റ്‌ഫോമിന് കർശന നിർദ്ദേശം നൽകിയിരുന്നു.നോട്ടീസ് ലഭിച്ചതിന് പിന്നാലെ, തങ്ങളുടെ വിശദമായ മറുപടി സമർപ്പിക്കുന്നതിനായി വാട്സാപ്പ് സർക്കാരിനോട് കൂടുതൽ സമയം ആവശ്യപ്പെട്ടിരുന്നു. കൂടാതെ ചർച്ചകൾ പൂർത്തിയാകുന്നതുവരെ ഈ ഫീച്ചർ ഇന്ത്യയിൽ അവതരിപ്പിക്കില്ലെന്ന് അവർ സർക്കാരിന് ഉറപ്പ് നൽകുകയും ചെയ്തിരുന്നു.കേന്ദ്ര ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയത്തിന് (MeitY) ഇപ്പോൾ വാട്സാപ്പിന്റെ മറുപടി ലഭിച്ചിട്ടുണ്ടെന്നും അവർ അത് പരിശോധിക്കുകയാണെന്നും പിടിഐ വൃത്തങ്ങൾ അറിയിച്ചു. വ്യാഴാഴ്ച ഐടി മന്ത്രാലയത്തിന് സമർപ്പിച്ച ഈ മറുപടിയെക്കുറിച്ച് വാട്സാപ്പിന്റെ ഭാഗത്തുനിന്ന് ഇതുവരെ ഔദ്യോഗിക പ്രസ്താവനകളൊന്നും വന്നിട്ടില്ല.നേരത്തെ, സിഐഐ ജിസിസി ബിസിനസ് സമ്മിറ്റിന്റെ (CII GCC Business Summit) ഭാഗമായി സംസാരിക്കവെ ഐടി സെക്രട്ടറി എസ്. കൃഷ്ണൻ, നോട്ടീസിനുള്ള വാട്സാപ്പിന്റെ മറുപടി വ്യാഴാഴ്ച സമർപ്പിക്കേണ്ടതുണ്ടെന്ന് വ്യക്തമാക്കിയിരുന്നു.സമാനമായ യൂസർനെയിം ഫീച്ചറുകളുമായി ബന്ധപ്പെട്ട് ടെലിഗ്രാം, സിഗ്നൽ എന്നീ ആപ്പുകൾക്ക് അയച്ച നോട്ടീസുകൾക്ക് മറുപടി ലഭിച്ചിട്ടുണ്ടോ എന്ന ചോദ്യത്തിന്, "അവർക്ക് മറുപടി നൽകാൻ ഇനിയും കുറച്ചു സമയം കൂടിയുണ്ട്, അതിനാൽ അവരുടെ മറുപടികൾ ഇതുവരെ ലഭിച്ചിട്ടില്ല. ഈ വിഷയം ഞങ്ങൾ വിശദമായി പരിശോധിക്കും," എന്ന് കൃഷ്ണൻ മറുപടി നൽകി.