ഇറാനിയൻ സൈനിക കേന്ദ്രങ്ങൾക്ക് നേരെ അമേരിക്ക പുതിയ റൗണ്ട് വ്യോമാക്രമണങ്ങൾ ആരംഭിച്ചതിന് പിന്നാലെ, കഴിഞ്ഞ മാസം ഒപ്പുവെച്ച സമാധാന ഉടമ്പടി ഇനി തങ്ങൾക്ക് ബാധകമല്ലെന്ന് ഇസ്ലാമിക് റിപ്പബ്ലിക് പ്രഖ്യാപിച്ചു. കൂടാതെ തന്ത്രപ്രധാനമായ ഹോർമുസ് കടലിടുക്കിന് മേൽ പൂർണ്ണമായ യുദ്ധകാല നിയന്ത്രണം ഏർപ്പെടുത്തുമെന്നും ഇറാൻ വ്യക്തമാക്കി.

ഹോർമുസ് കടലിടുക്കിലൂടെ കടന്നുപോകുന്ന വാണിജ്യ കപ്പലുകളെ ആക്രമിക്കാൻ ഉപയോഗിക്കുന്ന സൈനിക ശേഷികളെയും പുതിയ ഭീഷണികളെയും ലക്ഷ്യമിട്ടാണ് തങ്ങൾ ആക്രമണം നടത്തിയതെന്ന് അമേരിക്ക വ്യക്തമാക്കിയതിന് പിന്നാലെയാണ് ഇരുരാജ്യങ്ങളും തമ്മിലുള്ള തർക്കം ഇത്രത്തോളം രൂക്ഷമായത്.ഇറാന്റെ തുറമുഖങ്ങൾക്കും തീരപ്രദേശങ്ങൾക്കും ചുറ്റും അമേരിക്ക പുതിയ നാവിക ഉപരോധം ഏർപ്പെടുത്തുന്നതിന് തൊട്ടുമുമ്പാണ് ഈ ആക്രമണങ്ങൾ ഉണ്ടായത്. ഇതിന് പിന്നാലെ വാഷിംഗ്ടൺ ഹോർമുസ് കടലിടുക്കിന്റെ രക്ഷകനായി (ഗാർഡിയൻ ഓഫ് ദി ഹോർമുസ് സ്ട്രെയിറ്റ്) മാറുമെന്ന് പ്രസിഡന്റ് ഡൊണാൾഡ് ട്രംപ് പ്രഖ്യാപിക്കുകയും ചെയ്തിരുന്നു.പ്രതികരിച്ചുകൊണ്ട്, ഫെബ്രുവരി 28-ന് ആരംഭിച്ച സംഘർഷം അവസാനിപ്പിക്കുന്നതിനായി ജൂൺ 17-ന് ഒപ്പുവെച്ച ധാരണാപത്രം (MoU) വാഷിംഗ്ടൺ ഫലത്തിൽ തകർത്തതായി ഇറാന്റെ ഡെപ്യൂട്ടി വിദേശകാര്യ മന്ത്രി കാസിം ഗരീബാബാദി കുറ്റപ്പെടുത്തി.അമേരിക്ക ധാരണാപത്രം ലംഘിക്കുക മാത്രമല്ല ചെയ്തിരിക്കുന്നത്. ഇന്നത്തെ നാവിക ഉപരോധത്തോടെ ആ കരാർ ഫലത്തിൽ ഇല്ലാതായിരിക്കുകയാണ്. ഈ ധാരണാപത്രത്തിന്റെ വ്യവസ്ഥകൾ പാലിക്കാൻ ഇറാൻ ഇനി ബാധ്യസ്ഥരല്ല," ഇറാൻ ഔദ്യോഗിക ടെലിവിഷന് നൽകിയ അഭിമുഖത്തിൽ ഗരീബാബാദി പറഞ്ഞു.തന്ത്രപ്രധാനമായ ഈ ജലപാത ഇറാന്റെ ദേശീയ സുരക്ഷയുടെ പ്രധാന കേന്ദ്രമാണെന്ന് വ്യക്തമാക്കിക്കൊണ്ട് ഗരീബാബാദി ടെഹ്‌റാന്റെ നിലപാട് കൂടുതൽ ശക്തമാക്കി.സാധാരണ ഗതിയിൽ ഒമാൻ ഭരണകൂടവും ഈ കടലിടുക്കിന്റെ ഉത്തരവാദിത്തം പങ്കിടാറുണ്ടെങ്കിലും, നിലവിലുള്ള യുദ്ധകാല സാഹചര്യങ്ങൾ കാരണം ഈ പാതയിലുടനീളം പൂർണ്ണ നിയന്ത്രണം ഏർപ്പെടുത്താൻ ഇറാൻ നിർബന്ധിതരായിരിക്കുകയാണെന്ന് അദ്ദേഹം പറഞ്ഞു.ഇറാന്റെ തസ്നിം (Tasnim) വാർത്താ ഏജൻസി റിപ്പോർട്ട് ചെയ്തതനുസരിച്ച്, എന്ത് വിലകൊടുത്തും കടലിടുക്കിന് മേലുള്ള തങ്ങളുടെ പരമാധികാരം നടപ്പിലാക്കുമെന്ന് ഡെപ്യൂട്ടി വിദേശകാര്യ മന്ത്രി വ്യക്തമാക്കി.വാഷിംഗ്ടണുമായി ഉടനടി യാതൊരുവിധ നയതന്ത്ര ചർച്ചകൾക്കുമില്ലെന്നും ഗരീബാബാദി തറപ്പിച്ചുപറഞ്ഞു. "അമേരിക്കയുമായി ചർച്ചകൾ നടത്താൻ ഇറാൻ ഒരിക്കലും അഭ്യർത്ഥിക്കില്ല," അദ്ദേഹം കൂട്ടിച്ചേർത്തു.ഇറാനെതിരെയുള്ള ആക്രമണങ്ങൾ തുടരുന്നതിനിടയിൽ, ചർച്ചകൾക്ക് തയ്യാറായില്ലെങ്കിൽ സൈനിക നടപടികൾ കൂടുതൽ വ്യാപിപ്പിക്കാൻ വാഷിംഗ്ടൺ സന്നദ്ധമാണെന്ന് ഫോക്സ് ന്യൂസിന് നൽകിയ അഭിമുഖത്തിൽ ട്രംപ് മുന്നറിയിപ്പ് നൽകിയിരുന്നു.