അമേരിക്കൻ ഇടക്കാല തിരഞ്ഞെടുപ്പിലെ കനത്ത പരാജയത്തിന് പിന്നാലെ വൈറ്റ് ഹൗസിൽ അധികാരത്തർക്കവും പടിയിറക്കലും. തിരഞ്ഞെടുപ്പ് തോൽവിക്ക് ഉത്തരവാദി ചീഫ് ഓഫ് സ്റ്റാഫ് സൂസി വൈൽസും രാഷ്ട്രീയ ഉപദേശകരുമാണെന്ന് പ്രസിഡന്റ് ഡോണൾഡ് ട്രംപ് സ്വകാര്യ സംഭാഷണങ്ങളിൽ കുറ്റപ്പെടുത്തിയതായി ന്യൂയോർക്ക് ടൈംസ് റിപ്പോർട്ട് ചെയ്തു. ഭരണകൂടത്തിലെ രഹസ്യങ്ങൾ മാധ്യമങ്ങൾക്ക് ചോർത്തുന്നവരെ കണ്ടെത്താൻ സൂസിക്ക് കഴിഞ്ഞില്ലെന്നും, അവർ തന്നെയാണ് വിവരങ്ങൾ ചോർത്തുന്നതെന്നും ട്രംപ് ആരോപിച്ചതായാണ് റിപ്പോർട്ട്. മറ്റ് ജീവനക്കാരുടെ മുന്നിൽവെച്ച് സൂസിയെ രൂക്ഷമായി വിമർശിച്ചുവെന്നും റിപ്പോർട്ടുകൾ പറയുന്നു.

അതേസമയം, സൂസിയുടെ സ്ഥാനമാറ്റത്തെക്കുറിച്ച് മാധ്യമങ്ങളോട് സംസാരിച്ച ട്രംപ്, മാറ്റം ആഗ്രഹിച്ചതുകൊണ്ടാണ് തീരുമാനമെടുത്തതെന്ന് വ്യക്തമാക്കി. സൂസി മികച്ച രീതിയിലാണ് ജോലി ചെയ്തതെന്നും ചിലപ്പോൾ ജീവിതത്തിൽ ഇത്തരം മാറ്റങ്ങൾ അനിവാര്യമാണെന്നും അദ്ദേഹം പറഞ്ഞു. കഴിഞ്ഞ ദിവസങ്ങളിൽ പ്രധാന നിയമനങ്ങളുമായി ബന്ധപ്പെട്ട തീരുമാനങ്ങളിൽനിന്ന് സൂസിയെ മാറ്റിനിർത്തിയതായും റിപ്പോർട്ടുകളുണ്ട്. നവംബർ ആറിന് സൂസി തന്റെ അവസാന ദിവസമാണെന്ന് പ്രഖ്യാപിച്ചു. ട്രംപിനൊപ്പം പ്രവർത്തിക്കാൻ കഴിഞ്ഞത് ജീവിതത്തിലെ ഏറ്റവും വലിയ ബഹുമതിയാണെന്നും പദവി മാറിയാലും പ്രസിഡന്റിനോടും അദ്ദേഹത്തിന്റെ ലക്ഷ്യങ്ങളോടുമുള്ള പ്രതിബദ്ധത തുടരുമെന്നും അവർ പ്രതികരിച്ചു.സൂസി വൈൽസിന് പകരം ഡെപ്യൂട്ടി ചീഫ് ഓഫ് സ്റ്റാഫായിരുന്ന സ്റ്റീഫൻ മില്ലറെയാണ് ട്രംപ് പുതിയ ചീഫ് ഓഫ് സ്റ്റാഫായി നിയമിച്ചത്. കുടിയേറ്റത്തിനെതിരായ കടുത്ത നടപടികളുടെ പ്രധാന ആസൂത്രകരിലൊരാളാണ് മില്ലർ. കൂട്ട നാടുകടത്തൽ ഉൾപ്പെടെയുള്ള ട്രംപ് ഭരണകൂടത്തിന്റെ കർശന കുടിയേറ്റ നയങ്ങൾക്ക് പിന്നിൽ അദ്ദേഹത്തിന് നിർണായക പങ്കുണ്ട്. തിരഞ്ഞെടുപ്പിലെ തിരിച്ചടിക്ക് പിന്നാലെ നയങ്ങളിൽ മയപ്പെടുത്തൽ പ്രതീക്ഷിച്ചിരുന്നവർക്കിടയിൽ മില്ലറുടെ നിയമനം പുതിയ ചർച്ചകൾക്കും വഴിവെച്ചിട്ടുണ്ട്.റിപ്പബ്ലിക്കൻ പാർട്ടിക്ക് കോൺഗ്രസിന്റെ ഇരുസഭകളിലെയും നിയന്ത്രണം നഷ്ടമായ തിരഞ്ഞെടുപ്പ് തിരിച്ചടിക്ക് പിന്നാലെയാണ് ട്രംപിന്റെ ഈ നിർണായക നീക്കം. തിരഞ്ഞെടുപ്പ് ഫലത്തിന് പിന്നാലെ ഭരണകൂടത്തിലെ കൂടുതൽ മാറ്റങ്ങൾ ഉണ്ടാകാമെന്ന സൂചനയും അദ്ദേഹം നൽകിയിട്ടുണ്ട്. സൂസിയുടെ പടിയിറക്കവും മില്ലറുടെ സ്ഥാനക്കയറ്റവും ട്രംപിന്റെ രണ്ടാം ഭരണകാലത്തിന്റെ ശേഷിക്കുന്ന ഘട്ടത്തിൽ കൂടുതൽ കടുത്ത നയങ്ങളിലേക്കുള്ള നീക്കത്തിന്റെ സൂചനയായാണ് വിലയിരുത്തപ്പെടുന്നത്.