ടെഹ്റാൻ: അനിയന്ത്രിതമായ പണപ്പെരുപ്പവും പ്രാദേശിക കറൻസിയുടെ മൂല്യത്തകർച്ചയും കാരണം ഇറാനിൽ സാധാരണക്കാരുടെ ജീവിതം കടുത്ത ദുരിതത്തിലേക്ക്. അവശ്യസാധനങ്ങളുടെ വില ദിനംപ്രതി കുതിച്ചുയരുന്നതോടെ നിത്യനിവൃത്തിക്ക് പോലും വഴിയറിയാതെ വലയുകയാണ് രാജ്യത്തെ ജനങ്ങൾ. സാമ്പത്തിക തകർച്ചയ്ക്കൊപ്പം വരുംദിവസങ്ങളിൽ നയതന്ത്ര പരിഹാരമുണ്ടാകുമോ അതോ വീണ്ടുമൊരു സൈനിക ഏറ്റുമുട്ടലിലേക്ക് കാര്യങ്ങൾ നീങ്ങുമോ എന്ന അനിശ്ചിതത്വവും ജനങ്ങളുടെ ആശങ്ക വർദ്ധിപ്പിക്കുന്നു.

വർഷങ്ങളായി തുടരുന്ന കടുത്ത ഉപരോധങ്ങൾ, ആഭ്യന്തര ഭരണരംഗത്തെ വീഴ്ചകൾ, പുതിയ യുദ്ധ പ്രത്യാഘാതങ്ങൾ എന്നിവയാണ് ഇറാന്റെ സമ്പദ്‌വ്യവസ്ഥയുടെ നട്ടെല്ലൊടിച്ചത്. യുദ്ധസമാനമായ അന്തരീക്ഷവും ഭാവിയെക്കുറിച്ചുള്ള അനിശ്ചിതത്വവും സാധാരണക്കാരുടെ ദിനംപ്രതിയുള്ള ജീവിതത്തെ കടുത്ത സമ്മർദ്ദത്തിലാഴ്ത്തിയിരിക്കുകയാണ്.

അതേസമയം, നയതന്ത്ര ചർച്ചകളിലൂടെ പ്രശ്നപരിഹാരമുണ്ടാകുമെന്ന പ്രതീക്ഷകളും മങ്ങുകയാണ്. ഇറാനെതിരെയുള്ള ഉപരോധങ്ങൾ ഇനിയും ശക്തമാക്കുമെന്ന് യു.എസ്. പ്രസിഡന്റ് മുന്നറിയിപ്പ് നൽകി. എന്നാൽ നിലവിൽ അമേരിക്കയുമായി യാതൊരുവിധ ചർച്ചകളും നടക്കുന്നില്ലെന്നാണ് ഇറാന്റെ വിദേശകാര്യ മന്ത്രാലയം വ്യക്തമാക്കുന്നത്. ഇതോടെ സമാധാന പ്രതീക്ഷകൾ പൂർണ്ണമായും ഇല്ലാതാകുകയും രാജ്യം കൂടുതൽ വലിയ പ്രതിസന്ധിയിലേക്ക് നീങ്ങുകയുമാണ്.