മൈക്രോസോഫ്റ്റ് സഹസ്ഥാപകനും ലോകസമ്പന്നനുമായ ബിൽ ഗേറ്റ്സിന്റെ വ്യക്തിജീവിതത്തെയും അന്താരാഷ്ട്ര ബന്ധങ്ങളെയും ചുറ്റിപ്പറ്റിയുള്ള പുതിയ വെളിപ്പെടുത്തലുകൾ ആഗോളതലത്തിൽ വലിയ ചർച്ചയാകുന്നു. അന്തരിച്ച കുപ്രസിദ്ധ ലൈംഗിക കുറ്റവാളി ജെഫ്രി എപ്സ്റ്റീനുമായി ബന്ധപ്പെട്ട യുഎസ് കോൺഗ്രസ് സമിതിയുടെ അന്വേഷണത്തിനിടെ, തനിക്ക് മൂന്ന് വിവാഹേതര ബന്ധങ്ങളുണ്ടായിരുന്നുവെന്ന് ബിൽ ഗേറ്റ്സ് തുറന്നുസമ്മതിച്ചു. അടച്ചിട്ട വാതിലിൽ നടന്ന മൊഴിയെടുപ്പിലെ വിവരങ്ങൾ ജൂൺ 16-നാണ് പുറത്തുവന്നത്.

തന്റെ വ്യക്തിപരമായ രഹസ്യങ്ങൾ ഉപയോഗിച്ച് എപ്സ്റ്റീൻ തന്നെ ബ്ലാക്ക്മെയിൽ ചെയ്യാൻ സാധ്യതയുണ്ടായിരുന്നുവെന്ന ഗുരുതരമായ സംശയവും ഗേറ്റ്സ് മൊഴിയിൽ പങ്കുവെച്ചിട്ടുണ്ട്. എപ്സ്റ്റീന്റെ പക്കലുണ്ടായിരുന്ന ചില ഇമെയിലുകൾ പരിശോധിക്കുമ്പോൾ, തന്നെ സമ്മർദത്തിലാക്കാൻ അദ്ദേഹം ഈ വിവരങ്ങൾ കരുതിവെച്ചിരുന്നതായി വ്യക്തമാണെന്ന് ഗേറ്റ്സ് പറഞ്ഞു. എങ്കിലും തന്നെ നേരിട്ട് ബ്ലാക്ക്മെയിൽ ചെയ്യാൻ എപ്സ്റ്റീന് സാധിച്ചിട്ടില്ലെന്നും അദ്ദേഹം കൂട്ടിച്ചേർത്തു.ബിൽ ഗേറ്റ്സ് വിവാഹേതര ബന്ധം പുലർത്തിയിരുന്ന മൂന്ന് സ്ത്രീകളുടെ പേരുവിവരങ്ങളും ഇതോടെ പരസ്യമായി. ഇതിൽ രണ്ടുപേർ റഷ്യൻ സ്വദേശിനികളാണ്. ബ്രിഡ്ജ് എന്ന കാർഡ് ഗെയിമിൽ അന്താരാഷ്ട്ര തലത്തിൽ ശ്രദ്ധേയയായ നില അന്റണോവയാണ് ഒരാൾ. രണ്ടാമത്തെ വനിത ആണവ ശാസ്ത്രജ്ഞയായ കരിമാ നിഗമതുലിനയാണ്. ഡോക്ടറും പ്രമുഖ ആരോഗ്യ സംരംഭകയുമായ ഡോ. ആലിസ് ജേക്കബ്‌സ് നെസൽറോട്ട് ആണ് മൂന്നാമത്തെ വനിത.ആദ്യഘട്ടത്തിൽ രണ്ട് റഷ്യൻ വനിതകളുമായുള്ള ബന്ധം മാത്രമാണ് ഗേറ്റ്സ് സമിതിക്ക് മുന്നിൽ സമ്മതിച്ചിരുന്നത്. എന്നാൽ പിന്നീട് എപ്സ്റ്റീൻ അയച്ച ചില ഇമെയിൽ രേഖകൾ സമിതി തെളിവായി നിരത്തിയതോടെയാണ് ഡോ. ആലിസുമായുള്ള മൂന്നാമത്തെ ബന്ധവും അദ്ദേഹം സ്ഥിരീകരിച്ചത്. ഈ ഇമെയിലുകളിൽ വസ്തുതകളും അസത്യങ്ങളും കൂട്ടിക്കലർത്തി തനിക്കെതിരെ ഉപയോഗിക്കാൻ എപ്സ്റ്റീൻ പദ്ധതിയിട്ടിരുന്നതായി ഗേറ്റ്സ് വ്യക്തമാക്കുന്നു.അതേസമയം, എപ്സ്റ്റീൻ ഫയലുകളുമായി ബന്ധപ്പെട്ട് തനിക്കെതിരെ ഉയർന്ന ലൈംഗികരോഗ ആരോപണങ്ങൾ ബിൽ ഗേറ്റ്സ് പൂർണ്ണമായും നിഷേധിച്ചു. മുൻപ് ഒരിക്കൽ ആരോഗ്യപരമായ ചില ആശങ്കകൾ തോന്നിയിരുന്നു എന്നത് ശриയാണെങ്കിലും, അത് ഒരിക്കലും ലൈംഗികരോഗമായിരുന്നില്ലെന്ന് അദ്ദേഹം കമ്മറ്റിക്ക് മുൻപാകെ തറപ്പിച്ചുപറഞ്ഞു. രഹസ്യമായി ആർക്കെങ്കിലും മരുന്നുകൾ എത്തിച്ചുനൽകി എന്ന പ്രചാരണങ്ങളും അടിസ്ഥാനരഹിതമാണെന്ന് അദ്ദേഹം വ്യക്തമാക്കി.2011-നും 2014-നും ഇടയിലുള്ള കാലയളവിലാണ് താൻ എപ്സ്റ്റീനുമായി കൂടിക്കാഴ്ചകൾ നടത്തിയിട്ടുള്ളതെന്ന് ഗേറ്റ്സ് വെളിപ്പെടുത്തി. ഈ കാലയളവിൽ 12 മുതൽ 14 തവണ വരെ നേരിട്ടും, രണ്ട് തവണ സ്കൈപ്പ് വഴിയും സംസാരിച്ചിട്ടുണ്ട്. വലിയ ജീവകാരുണ്യ പദ്ധതികൾക്ക് ആവശ്യമായ വിദേശ നിക്ഷേപകരെ കണ്ടെത്താൻ സഹായിക്കാമെന്ന എപ്സ്റ്റീന്റെ വാഗ്ദാനത്തിന്മേലാണ് ഈ കൂടിക്കാഴ്ചകളെല്ലാം നടന്നത്. എന്നാൽ ആ വാഗ്ദാനങ്ങളൊന്നും പിന്നീട് പ്രാവർത്തികമായില്ല.ലൈംഗിക കുറ്റകൃത്യങ്ങൾക്ക് ശിക്ഷിക്കപ്പെട്ട വ്യക്തിയാണെന്ന് അറിഞ്ഞിട്ടും എപ്സ്റ്റീനുമായി സമ്പർക്കം പുലർത്തിയത് വലിയൊരു തെറ്റായിരുന്നുവെന്ന് ബിൽ ഗേറ്റ്സ് സമ്മതിച്ചു. അദ്ദേഹത്തിന്റെ യഥാർത്ഥ സ്വഭാവം മനസ്സിലാക്കിയതോടെ ക്രമേണ ആ ബന്ധം പൂർണ്ണമായി അവസാനിപ്പിക്കുകയായിരുന്നുവെന്നും അദ്ദേഹം കമ്മറ്റിയെ അറിയിച്ചു.

വിവാദങ്ങൾ ആഗോളതലത്തിൽ പടരുന്ന സാഹചര്യത്തിൽ ബിൽ ആൻഡ് മെലിൻഡ ഗേറ്റ്സ് ഫൗണ്ടേഷനും കടുത്ത പ്രതിസന്ധിയിലാണ്. എപ്സ്റ്റീനുമായി ഫൗണ്ടേഷൻ ജീവനക്കാർ മുൻകാലങ്ങളിൽ നടത്തിയ ഇടപാടുകളെക്കുറിച്ച് നിലവിൽ ഒരു ബാഹ്യ അന്വേഷണം പ്രഖ്യാപിച്ചിട്ടുണ്ട്. നേരത്തെ ഫൗണ്ടേഷൻ ജീവനക്കാരുമായി നടത്തിയ ആഭ്യന്തര യോഗത്തിലും തന്റെ ഭാഗത്തുനിന്നുണ്ടായ വീഴ്ചകളിൽ ബിൽ ഗേറ്റ്സ് ക്ഷമാപണം നടത്തിയിരുന്നു.