ന്യൂയോർക്ക്: ഐക്യരാഷ്ട്രസഭാ സുരക്ഷാ കൗൺസിലിൽ സ്ഥിരാംഗത്വം നേടാനുള്ള ഇന്ത്യയുടെ നയതന്ത്ര ശ്രമങ്ങൾക്ക് അന്താരാഷ്ട്രതലത്തിൽ വൻ മുന്നേറ്റം. പോളണ്ട്, ഹംഗറി, സ്ലോവാക്യ, ചെക്ക് റിപ്പബ്ലിക് എന്നീ യൂറോപ്യൻ രാജ്യങ്ങൾ അടങ്ങുന്ന വിസെഗ്രാഡ് (V4) കൂട്ടായ്മ ഇന്ത്യയുടെ ആവശ്യത്തിന് ഔദ്യോഗിക പിന്തുണ പ്രഖ്യാപിച്ചു. ന്യൂയോർക്കിൽ നടക്കുന്ന യു.എൻ പൊതുസഭാ സമ്മേളനത്തിനിടെയാണ് വിസെഗ്രാഡ് നേതാക്കൾ നിലപാട് വ്യക്തമാക്കിയത്.ഗ്ലോബൽ സൗത്തിന്റെ പ്രാതിനിധ്യം ഉറപ്പാക്കാനും ഇന്തോ-പസഫിക് മേഖലയിലെ പ്രബല ശക്തിയെന്ന നിലയിലും ഇന്ത്യ സുരക്ഷാ കൗൺസിലിലെ സ്ഥിരസമിതിയിൽ ഉണ്ടാകേണ്ടത് അനിവാര്യമാണെന്ന് V4 രാജ്യങ്ങൾ ചൂണ്ടിക്കാട്ടി. അതേസമയം, ഐക്യരാഷ്ട്രസഭയിൽ പരിഷ്കാരങ്ങൾ വേണമെന്ന ആവശ്യത്തോട് അനുകൂലമായി പ്രതികരിക്കാൻ ചൈന തയ്യാറായതും ഇന്ത്യയുടെ നീക്കങ്ങൾക്ക് ഊർജ്ജമേകുന്നു.അമേരിക്ക, റഷ്യ, ഫ്രാൻസ്, ബ്രിട്ടൻ എന്നീ രാജ്യങ്ങൾ നേരത്തെ തന്നെ ഇന്ത്യയുടെ സ്ഥിരാംഗത്വത്തെ പിന്തുണച്ചിരുന്നു. ചൈനയുടെ കടുപ്പിട്ട നിലപാടുകളും വീറ്റോ അധികാരവുമായിരുന്നു ഇതുവരെ പ്രധാന തടസ്സമായി നിന്നത്. എന്നാൽ യു.എൻ ഘടനയിൽ കാലാനുസൃതമായ മാറ്റങ്ങൾ വരുത്താൻ തയ്യാറാണെന്ന ചൈനയുടെ പുതിയ നയം ഇന്ത്യയ്ക്ക് അനുകൂല അന്തരീക്ഷമാണ് ഒരുക്കുന്നത്. 1945-ൽ രൂപീകരിച്ച രക്ഷാസമിതി ഇന്നത്തെ ലോക യാഥാർത്ഥ്യങ്ങളെ പ്രതിഫലിപ്പിക്കുന്നില്ലെന്നും അടിയന്തര പരിഷ്കരണം വേണമെന്നും ഇന്ത്യ ദീർഘകാലമായി ആവശ്യപ്പെട്ടു വരികയാണ്.എങ്കിലും സാങ്കേതിക നടപടികൾ പൂർത്തിയാക്കി സ്ഥിരാംഗത്വം ഉടനടി ലഭ്യമാകാൻ സാധ്യതയില്ലെന്നാണ് വിലയിരുത്തപ്പെടുന്നത്. യു.എൻ ചാർട്ടർ ഭേദഗതി ചെയ്യുന്നതിന് പൊതുസഭയിൽ മൂന്നിൽ രണ്ട് ഭൂരിപക്ഷവും നിലവിലെ അഞ്ച് സ്ഥിരാംഗങ്ങളുടെ പൂർണ്ണ പിന്തുണയും ആവശ്യമാണ്. ഇതിനുപുറമെ, പുതിയ അംഗങ്ങൾക്ക് വീറ്റോ അധികാരം നൽകുന്നത് സംബന്ധിച്ച ചർച്ചകളിൽ ഇപ്പോഴും ആഗോളതലത്തിൽ അഭിപ്രായ വ്യത്യാസങ്ങൾ നിലനിൽക്കുന്നുണ്ട്. എന്നിരുന്നാലും, പുതിയ യൂറോപ്യൻ പിന്തുണയും ചൈനയുടെ നിലപാടിലെ അയവും സുരക്ഷാ കൗൺസിലിൽ അർഹമായ സ്ഥാനം നേടാനുള്ള ഇന്ത്യയുടെ പോരാട്ടത്തിന് വലിയ കരുത്തുപകരും.